Comedy Boroupi .. Machier Haddpi ... Tankam Amchi Xabaski !!

Comedy Boroupi .. Machier Haddpi ... Tankam Amchi Xabaski !!

- Wilmix Wilson Mazarello



KHOBOR:-
Kaim mhuinem fattim, hanv eka mellaveak gel’lom.
Kolakarancho mellavo to. Thuim veg-veglle kolakar haajir aslet.
Tiatr ani Nattkanche Producer(Nirmate), Director (Digdarxak), Actor(Nott),
Singer (Gayak), Music(Songitkar), Nattkam Boroupi adi ..adi..

Thuim pautanch, mhojea eka ixttan, mhaka konn-tori ekleachi ollokh korun dili.
Tachem nanv mhaka iead zaina, punn to konn tori nattkancho Producer / Director* , zo choddso, “Marathi Nattkam” boroita ani kedna-kednaim “Konknni-Nattkaim”, boroita toslo.
Ollokh kortanch, tannem mhaka kosle proxnn vicharle, ani hanvem taka kosle zabab dile, tem hanv tumkam, tumche mahiti khatir, sangtam:-

P*:-Tumgele tem....Tiatrachem borop.....Sogllich “Comedy” asta nhoim ?
W:- Nam ! Sogllich “Comedy” nasta. Tantunt anikui zaitem asta.
P*:- Toxen nhim.... Komint-komi 70% tori “Comedy” asta, nhoim ?
W:-Nam ! Komint-komi 70% gombhir vixoi asta. Somaz sudhraupaccho sondex..
Urlole 30% “Comedy”, mhunllear zata.
P*:- Punn tumkam “Comedy”-kuch lagun, lok voddtta. Hem matr khorem.
W:- Fott ! Tiatracho mukhel vixoi ,ani tacher adarleli kanni, ani nott-ani(actors) kel’leo bhumikeo(roles), teovui pollounk lok ieta.
Tiatra-rupant dil’lo vixoi, polloita astanach, ami lokank “comedy”-i dita.
Mhunnge lok, pott-bhor hansun, ani tachech borobor,ek somajik sondex gheun, ghara veta.
P*:- Punn tumi Tiatrist, samkoch gombhir Tiatr ken’nanch boroina. Tumkam tantunt , “Comedy” samkich gorjechi, nhim?
W:- Amkam Tiatrant “Comedy” gorjechi, karann amchea somazak “Comedy” gorjechi. Munxeanche jivitant “Comedy” gorjechi.
“Comedy” nastana , munxeanchem jivituch “odhurem” xem urta.
Sounsarant konnuch munis aschona zo aplem sompurn jivit ghombirtaienuch sarta.
Munxeank jivitant, vinod (Comedy) astach ani assunk zai.
Amcheanii, Tiatr boroita astana, ek samkoch gombhir vixoi gheum-ieta, punn ami ghena, karann “Tiatr”, ek somazacho “arso”.
Somazant vinod asta mhunttoch, Tiatrantui vinod assunk zai.


Hem mhojem bhaxonn, tea “Producer/Director”-ak, il’lem “ for” poddlem astelem , karann tea uprant, tannem Tiatranchi khoboruch bondh keli.
To chintunk poddla astolo, koslo kai mhunn, ho Tiatrist ?
Dor-eka proxnnank, hache laguim zabab assa. Ho, kossoch bagoupacho nam.

Mhoje zabab, taka “for” poddle zalear poddundi. Toxem pollounk gelear, mhakai tachem ulovop borem lagunk nam.
To uloupacho nett kortalo, zosso apunn boroch voir paunddear, ani tiatrist borech sokoilea paunddear.
To mellavo somptoch, ghara vetoch, mhakai mhojim chintnam thar dina zalim.
Porot-porot , toch Producer/Director* mhojea dolleam samkar, eunk laglo.
Porot-porot , tache proxnn mhoje motint eun, mhaka sotaitale.

Kaim chintnam /euzonneom, mhojea monant tedna, aileo , teo hanv aiz amcheam vachpeam mukar ghaltam:-

NIALL:-
Koslem chintop zait hea munxeachem? Tiatr fokot hansoupachoch, mhunnonk ?
To Producer, kedoi vhoddlo to zaum, tiatr polloupi kaim nhum.
Zalear, taka konnem sothea dilea , amchea Tiatracher aplem “urfattem” mot manddunk ?

Punn, dusre bazun pollounk gelear, zaite pautt, amchech munis oslem uloilelele aikunk etat.
Ulovop, zoxem “Tacho Tiatr, fokot Comedy-cher cholta”, ani “Comedy kaddli zalear, tachea Tiatrant dusrem kainch nam”.
Oslem ulovop, fokot nennar munxeanchem, zankam Tiatra-voir sarki mahitich nam.

Tiatrant “Comedy” aslear , tiatr odhikuch fulta, hantunt dubav nam.
Punn ek tiatr, khuinchoi to zaum, “fokot Comedy-cher cholta, ani tea tiatrantli Comedy kaddli zalear, tantunt dusrem kainch nam” oxem mhunnop, samkench chukichem.
Hem oxem uloupak karannuch nam.
Je, oxem uloitat, te Tiatr-polloinar zalear legit , apnnanchich izzot kaddtta.

SOTHAM:-
Konkani Tiatr heram nattkam, ani English Drama porim prekshak-ank kosli tori kanni sangta.
Somazak koslo tori sondex dita.
Konkani Tiatr, hivui ek, heram Nattkam/ English drama porim , bhumika korun dakhoupachi “kola”
Jitle bore toren, ap-apli bhumika, kolakar nibhaitat, titloch tea tiatracho dorzo, unchvea paunddear pauta.
Konkani Tiatr ani heram nattkam/drama modem, koslem tori veglleponn assa, punn tem veglleponn, “Vinod” (Comedy) tor nhuinch.

“Comedy” tor, English / Hindi/Marathi nattkanii asta, punn Konkani Tiatrant, “comedy “ ek tiatracho khaxelo bhag zala, hem mat khorem.
“Comedy” naslolo, ek passun Tiatr, mellonk kottin.
Konkani Tiatr-polloinnar, choddxe “Middle-Class”-intle.(Modhlo-Vorg)
Tiatr polloinnar choddxe, Goychea, Christaum Somazantle lok.
Heam amchea lokank, apleo ghorcheo rattavolli visrun, Tiatrachea “Hall”-ant bosun, jivitacho ek veglloch onubhov gheunk zai.
Tinuch vorank, zalear legit cholta.
Osleam lokank il’lem hansop gorjechem.
Hich tanchi goroz, puri korunk ami Tiatrist, tankam he “Comedy”-intlean , him hanspachim pirlam, ditaum.

Hacho orth osso zaina, ki ami “Comedy”-k lagun, Tiatrachi kanni, tantlo sondex, adi..adi..,kuxin uddoitaum.
Konnui kiteim mhunnom , “Comedy”, Konkani Tiatracho ek khaxelo bhag, ani to borinch vorsam “khaxelo-bhag”, urtolo.

Tech porim , ami ditaum titlii “comedy” lokank manta , oxeim amchean mhunnonk zaina.
Choddxi “Comedy”, jika Tiatrache kannienk sombondh asta tosli “comedy” lokank avoddta..
Hem zanno-zaunui, kaim Tiatrist aplea tiatrant osli “Comedy” ghaltat, jika Tiatrache kannienk sombondh nasta.
Tacho porinnamui, “vaitt” zalolo ami polllela.
Zanno zauni oxem kortat, tachem karann sodhlear mellta.


KARANN :-
Choddxe pauttim, tea Tiatr-achea boroupeak :Comedy” borounk kollona.
Mhunnttoch to ti “comedy” , anik konnaim-koddchean boroun gheta , punn “Comedy” boroitelak, to aplea Tiatrachi, sogli kanni sangona, vo to tea “Comedy” boroiteleak, aplea tiatrachi borpavoll (Script) dakhoina

Mhunnttoch to “Comedy” boroupi, babddo aple ikmotin, kaim fokanddamchim pirlam boroun gheun eta, ani tim khuim tori, ek rosteacho podd’do uddoun, lokank hansoupacho proitn korta.

Osle “comedy”-k ani Tiatrache kannienk, kosloch sombondh nasta.
Amche Comedian , oslei “Comedy-”intlean lokank hansoitat , punn lokanchi favo tosli xabaski tankam mellona.

SUDHAROP:-
Khoreponni , choddxe Tiatr boroupi aplea tiatrani, Tiatrache kannienk sombondh aslelich “Comedy” boroitat.
Punn alinchea kallar, kaim Tiatr boroupi utpon zaleat , zankam Tiatr borounk kolltta punn tiatrantli “Comedy” borounk kollona.
Tantunt kainch vaitt nam. Tem amchean, tanchem unnemponnui mhunnonk zaina.
Dev, soglech gunn sogleank dinam.

Oslea vatavoronnant atam, kaim Comedy” boroupi utpon zaleat, je “Comedy” borounk, noko-asleleank, “comedy” boroun ditat.
Hi ek bori gozal , karann Comedy borovop hi ek vegllich “Art”. Ti sogleankodde zaina.
Ti kola angant asleleanuch boroilear, borea, unch dorzeachi Comedy, polloinarank pollounk, mellonk xokta.

Tech porim, “Comedy” boroiteleank, borovop sompem zait , punn tich “Comedy”, favo te toren machier, korun dakhounk, borench augodd.
Kitlii bori, tum “Comedy” borouxi, ti folladik zaum eta fokot, borea “Comedian’an, ti kelear.
Borea “comedian”-ank, ek gunn asta, koxe porim, tech boroil’le Comedy”k, lokank hansoupa sarkem, “rup” diunk.

Atanchea kallar, aplea tiatrani apunnuch “Comedy” boroitat, tantlea kaim boroupeam modlim nanvam poilech nodrek etat, tantunt he:- Roseferns, Prince Jacob, John D’Silva, Tomazinho Cardozo, Wilmix adi ..adi.

Kaim “Comedy” boroupi, je heram Tiatr-boroupeank, “Comedy” borounk adar ditat, tantunt kaim nanvam poilech nodrek etat, tim him:- Comedian Dominic, Comedian Agustinho, Comedian Ambe, Comedian Peter D’Costa, Comedian Hortencio adi ..adi.

Tor Ixttano , dusre pautt tumi khuichoi tiatr polloita astana, tantuntli “Comedy” polloun pott–bhor hansunk ailem zalear, goddiek zaum eta , ti “Comedy” tea Tiatrachea, boroupeachi vo digdorspeachi nhuim.
Ti dusreach konn tori boroupeachi, assum ieta.
Ti konnem boroum . Tem tumi sodhunk bhovonakat.
Tem zanno-zaunui ,tumkam vo amkam, kainch mellpachem nam.
“Comedy” sudhorta, itlench ghorjechem.
Pott-bhor hansat , khoxi zeat, xabaski dieat, ani ghara vochat.

Tumcho, Wilmix
(c) Wilmix Wilson Mazarello
Wilson Mazarello [wilson_mazarello@rediffmail.com]
http://www.goa-world.com/goa/tiatr/

Archives: http://brestarpodddeafattlean.blogspot.com/2008/03/pordddea-fattlean.html