TIATRIST ANI SOMAZ-SEVA

TIATRIST ANI SOMAZ-SEVA

- Wilmix Wilson Mazarello

Khobor:-
Mars-ache 29ver 2008, Benaulim, Dando, Khella-Moidanar,Sanjvellar, Bannavlekaranchi ek vhodd zomat bhorli.
Ti zomat ghoddun haddli “Benaulim Villagers Action Committee” he, novech ghoddun haddlele, Sounsthen.
Tancho hetu, Benaulim-chem Poryavoronn sambhallchem ani Benaulim- gaunchem
sobit vatavoronn rakhpa-khatir, Panchayatin, khuicheai “Builder”-ank, unch malliancheo imaroti bandhunk “N.O.C “ diuncheo nhuim.
Dileat zalear, teo porot gheuncheo.
Kitlem “mahaan” chintop, hea ganvchea lokanchem.
Hanv, odhikuch khoxi zalom polloun, he chollvollint fuddakar gheupi asle mhunn
dog-zann Tiatrists, Roseferns ani Ben Envangelisto (dogui Bannaulekar).

Ho, Tiatristancho somajik vaur polloun, mhojea monant ek vichar ailo, to osso :-
Zaito Lok Tiatristam voir oxem chinta, ani kednaim uloilelei aikon-eta, “Tiatrist, Tiatr boroitat, kantaram rochtat ani aplem pott bhorpa khatir, te Tiatr/Kantaram, machier haddttat”.

Hem Chintop/Ulovop chukichem. Oslem chintop/ulovop asta fokot, oxir-monanchea munxeanchem.
Sarki khobor nokllo astanam ,konnankuch odhikar nam dusreachi “Nit” korunk vo dusreacher “Formonn” marunk.
Tiatristanchi nit korunk,vo ganvar khobro ghalunk tor, odhikar nanch.

Inglezint ek mhun’nni assa “Only the wearer knows ,where the shoe is pinching”.
Zoxe porim, Xettichem kaam, Xettich zannam, tech porim Tiatristanchem kaam, Tiatristuch zannam.
Titristanchem kaam ani Tiatristancho upeog, zanno-zaunk tum tiatristam-modloch assunk zai. Tednanch tuka khoro onbhov zatolo khorea Tiatristancho ani tanchea vauracho.

Amcheam Tiatristanche choddanchodd Tiatr, Somajik vixoeancher attaplele astat. Somazant vaitt borem kitem ghoddta tem, tiatrist aplea Tiatrantlean vo kantarantlean loka-mukar haddttat.
Boro vaur vakhannttat ani vaitt-vauracher “boddi-martat”.
Zaite pauttim, Somazachea boreponna-khatir Tiatrist, Serkarak zaum her Odhikareank bori “budh” ditat.
Zor Tiatristank , aplem pott-uch bhorpa-khatir Tiatr borounk vo Kantaram rochunk zai aslim, zalear somajik vixoiich te kiteak ghetele asle?
Saade, hansoupache/nachoupache vixoi puro asle. Oxem tumkam dissonam ?
Toslei Tiatr polloupak, ani tosliim kantaram aikopak, lok tor etach.

Punn Nam ! Tiatrist-ank Somazacho “usko” assa.
Dekunuch te, ap-aple toren Tiatr/Kantaram boroun/rochun, somazachi seva kortat.

Atam thoddo vell, “Tiatrachi Machi-ich” kuxin dourun, amchea somazak, Tiatristancho anink-koslo faido assa, hacher vichar korunea.
Tiatrist, Titra-bhair , somaza-khatir anink kitem tori kortat kai ?

Chodd fattim vechi goroz nam.
Alinch, gelea June-anchea mhuineant (2007), jedna Goyche Vidhan Sobhechim eleisanvam zalim, tedna choddan-chodd Tiatristani “Romi Lipi”-ek maniotai melloun gheunchea khatir lokam-modem zagrutai nirmann korpacho vaur hatant ghetlo.
Tancho hetu itloch.
Romi Lipi-ek serkari maniotai mellchi ani Goychea, eka somaza-sovem ji onit ghoddlea, ti nopoit zaunchi.
Tech porim amchea lokan, fokot Romi Lipi-ek tenko diteleam amdarank nivddun haddun, Vidhan Sobhent, favo toslem vatavoronn nirmann korchem.

Kaim oxir-monanche munis, torui astana mhunnot, ki Romi Lipi Tiatrist-ankuch boreak poddpachi. Teach passot te vaurtat.
Hem zaun assa, teanch uloiteleanchem “nennarponn”.
Te nokllot, Romi Lipi-echo faido sogleach Konknni Somazak zauncho assa mhunn, nhuim fokot Tiatristank.
Atam Tiatrist, itle vaurlea uprantui, ti maniotai “Romi Lipi”-ek azunuim mellonk nam, ti veglli gozal.
Punn Tiatristani suru kel’lo vaur azunui chaalu assa ani “Romi Lipi”-ek maniotai mellosor , ho vaur chaalu astolo.

Goy, Goykaram-passot rakunk, tiatrist:-
Adlea ,Goy Serkaracho “Regional Plan 2011”, hacher nixedh marunk ani Goy, Goykaram passot rakunk, jedna “Goa Bacchao Abhiyan” rochlelem, tedna Tiatrist “Wilmix’ GBA-che vedir eun, Goykarank zagoilele. Aiz tacho faido amkam, sogleam Goykarank mell’la.
Ho, amchea Somaza-khatir kelolo Tiatristancho,vaur nhuim ?

Konkani Martyr-ank maan diupak, Tiatrist:-
Dezembrache 19 ver, 2007, Margao, Lohia Moidanar, ‘Romi Lipi Action Front” he Sounsthen, ek vhodd zomat ghoddun haddli.. He zomatik haajir asle kitlexech Padri , ani Goychea Somazantle, vhoddle vhoddle Nagrik.
Tantunt fuddakar gheupi Tiatrist asle, Wilmix ani Prince Jacob. Uloupeam modem Tatrist asle Tomazinho Cardozo, Anil Kumar ani Premanand Lotlikar.
Tech porim tenko diupak ani khoxen kantaram gaunk fuddem sorle kitlexech tiatrist. Tanche modem, asle Cyriaco Dias, Rico Rod, Jessie Dias, Xavier Gomes, Francis de Tuem, Sharon, Lawry Travasso, Ave, Aniceto, Effie Fernandes, Fatima, Rons Tavares, Joaquim Cabral, MuzgankarAgnelo Dias ani tache sangati, adi adi.


Konkani Ontoraxttrik mollar , Tiatrist:-
Janerache 26ver ani 27ver ,2008, jedna Mongllurant , “Konkani Nirontori” ghoddun haddli, ani Konkani Bhaxek, Ontoraxttrik mollar pavoili, tedna aple khoxen Goyche teg-zann Tiatrist, tantun vanttekar zaunk gele.
Aiz Konkani Tiatristanchem nanv “Guinness Book of World Records” hantunt pavoilem, Bab Wilmix. Bai Sharon ani Norman Cardozo, hannim.

Xikxonnik mollar, Tiatrist :-
Zorui iskolacheam bhurgeank xikovop, hi ek vyavasai, torui to ek boro somajik vaur.
Heavui somajik vaurant, kaim Tiatristanchim navam nodrek etat tim oxim :- Tomazinho Cardozo, Irene Cardozo, Aplon D’Cruz, Effie Fernandes adi adi. Tech porim Sharon Mazarello, hi aplem “Theatre Art & Cultural Institute “ choloita, zuim kitleaxeach bhurgeank ani tornatteank “Music” xikpachi sondhi melltta.
Goyche, choddan-chodd Muzgankar-ui, a-aplea ganvant nove pillgek muzgaponn xikoupachea vaurant assat.
Tor ho oslo, Tiatrisrancho vaur, eke torechi, somaz-seva nhuim ?

Dhormik Vaurant , Padri Tiatrist :-
Tankam ami “Padri-Tiatrist’ mhunno-ieta, vo “Tiatrist-Padri” mhunno-ieta.
Kitlexech Goynche Padri, zanchea angant “Tiatr-kola” assa, te Tiatrachea madhyam-antlean , “Devachem Utor”, lokam-meren pavoitat.
Oslea “Tiatrist-Padrim”-modem, kaim nanvam alinchea kallar aikonk etat, tim oxim :- Sorgest Pdr. Freddy J Da Costa, Pdr. Nevel Gracias, Pdr.Concessao Da Silva,
Pdr. Peter Cardozo, Pdr. Jose Anton Da Costa, Pdr Planton Faria, Pdr Thomas Lobo,
Pdr Robin adi adi.

Her Somajik Vaurant, Tiatrist :-
Voir sanglelea vauram-bhair legit, kaim Tiatrist ap-aple toren, somaz-seva, kortat.
Kaim Tiatrist, gaumchea Panchayat-ant legit, Panch vo Sarpanch zaun gaumchi seva kortat . Tantunt kaim nanvam nodrek etat tim oxim:- Meena Leitao, Minin de Bandar, Joaquim D’Costa, Succur de Santacruz, Milagres de Chandor, adi adi .

Him zaun assat, thoddim-bhov udharonnam, goir-somoz asleleank kollounk, ki Tiatrist fokot “Tiatr” boroupachench ani “Kantaram” rochpachench kaam korinant.
Tancho, somajik vaurantui, zaitoch “haath-bhaar” assa.

Heach passot, mhojem hem sangnnem, team munxeank, je sarki khobor nokllo asatana uloitat, ki Tiatrist-ank Somazant dusro kosloch upeog nam mhunn.
Tennim itlean, ho tancho goir-somoz, pois korcho.

Dusreanchi “Nit’ korop, vo dusreancher “Formonn’ marop, hem tanchem kaam nhuim.
Nit korpi, ekloch Dev.

Hem mhojem “borovop” sompoitana, mhaka Swami Jezu-che, eke xikounnencho iead zata, (Lukas: 6, 37 tem 38 ani 41 tem 42):-

Tumi Nit korum nakat ani Dev tumchi Nit korchonam. Khastichem formonn marinakat ani tumcher formonn marchenant. Bhogsat ani tumkam bhogsonnem melltelem. Dieat ani tumkam ditele; borem map,damun-chepun,haloun suien bhorun ot’ta toslem tumche unttient ghaltele.Tor tumi zokxat teach mapan tumkam porot zokun ditele.”

“Tujea bhavachea dolleant assa tem kissor tum kiteak polletai, ani tujea dolleant assa ti patti tuka dixtti poddonam?
Ani tujea dolleantli patti tuka disonam zalear , tujea bhavak tujean koxem mhonnum-iet: ‘Are bhava, rav,tujea dolleantlem kisor mhaka kaddum di’.
Dhongea, tujea dolleantli patti poilim kadd ani magir tujea bhavachea dolleantlem kisor kaddunk tuka nivoll dixtti poddtelem.”

(c) Wilmix Wilson Mazarello
Wilson Mazarello [wilson_mazarello@rediffmail.com]

http://www.goa-world.com/goa/tiatr/

Archives: http://brestarpodddeafattlean.blogspot.com/2008/03/pordddea-fattlean.html