Tiatrachi Khori Udhorgot

Tiatrachi Khori Udhorgot

- Wilmix Wilson Mazarello



GENERAL
English Bhaxent ek mhunni assa, “Two heads are better than One “. Mhunnge ekach proxnnancher zorui dogam zannani, ekttaim zaun, chintop kelem zalear, nikall odik boro eunk xokta.
Vo ekuch kaam, dogam zannani, ekvottan kelem zalear tench kaam, begin zaunk xokta.

Tech, English bhaxent anink ek mhunni assa , “Too many Cooks Spoil the Soup”. Mhunnge, ekach kamant chodd zann menter zale zalear, tem kaam bigddonk xokta.
Vo, sogleanchench aikota to, ekleacheim chaalik launk pavona.

Heo donuim mhunn’neo aikolea uprant, oxem dista ki, ek mhunni dusre mhunn’necher virudh assa kai kitem ?
Ek mhunni sangta, chodd zann titlem borem. Dusri mhunni sangta, chodd zann titlem vaitt.
Atam khuinchem khorem, ani khuinchem fals ?

Donui mhunn’neo khoreo, punn veg-veglleam sondorbhant.
Udharonn 1:- Ek vauraddi, xetachi bandhi luvunk, ek vor laita. Tench kaam dogam vauraddeank korunk lailem zalear, ordhea vor-ant sompta. Hoi kai nam ?
(Two heads are better than One)

Udharonn 2 :- Randop begin zaupak zai mhunn kuznant, ekachea boldek dog zann kuzner dovorle.
Dogui chinta apunn voddlo.
Eklo sangta, mossalo chodd ghalunk zai, zalear dusro sangta, mossalo thoddo ghalunk zai. Eklo sangta mitt subez ghalunk zai, zalear dusro sangta, mitt thoddem ghalunk zai. Dogui zhogddonk lagta.
Randop zaiich nam.
(Too many Cooks spoil the Soup)

Aiz hanv, mhojea vachpeank, English-Bhaxa xikounk fuddem sorlam kai kitem ?
Oxem dista nhuim ?
Punn nam. Hanv konnank English-Bhaxa xikounk fuddem soronk nam.
Aiz, heam donaim mhunn’neancher il’li somzonni diunk, mhaka karann assa.

KARANN
Zaite pauttim, ami Tiatrist, heo osleo mhunneom, nhum tea vellar, vou nhum tea zagear vapurtam.
Chodd korun dusri mhunni “Too many cooks , spoil the Soup”

Konnuim amcheam tiatristank sangot, “Arre baba, soglim kaama tum ekloch kortai ? Dusreanchii modot ghe murre”.
To kossoch aikonk toear nam.
Tachea tiatrant, toch boroinnar (Playwright), toch digdorspi (Director), toch nirmato (Producer), toch kantaram rochta (Composer), toch kantaram gaita (Singer), toch bhumikai korta (Actor), adi..adi..adi.
Tachem chintop, apunn soglem zannam, ani jitlo apunn zannam, titlo konnunch nennam. (Playwrighting, Directing, Producing, Composing, Singing, Acting, etc..etc..etc.)

To, tim kamam, kossoch, dusreachea hatant patienam.
Tim kaamam magir koxiim zaum.
Vellar zainant, sarkim zainant, sudharop dissona, udorgoth dissona , adi..adi..adi.

Hanvem polloileat, kaim konkani tiatrist, velean gorvan sangtat, “Tiatr, hi ekuch Machi zuim Director, itlim sogott kaamam, ekloch korta”.

Tor hem oslem nanv, vo vhoddponn amcheam Tiatr-Director-ank zai ?
Ek munis, itlim sogott kaama korta mhunn, amche tiatr chodd bore zata kai ?
Vo,amche Tiatr-Director, apunn soglinch kaama korunk sodhta mhunn, ekai kaamacher sarko bhor ghalunk pavona zait ?
Hacher amcheam Boroupeani, ‘Director’-ani, “Producer”-ani, khor niall korchi goroz assa.

Kaim oxir monanche “Director” mhunttelet, “Itlim vorsam ami he toren tiatristponn cholounk nam ?
Ami, amche tiiatr “hit” korun dakhounk nam ?”

Kelea zait. Nam mhunnonkui zaina.


VANTTUN DIL’LEM ZALEAR
“Director’-an, zorui soglim kaama eklean korun, tiatr “hit” korun dakhoilo, tinch kaama vanttun dil’lim zalear tiatr aninkui kitlo”hit” zatolo also , hem chintlaim ?.

“Director”-an apnnem, soglinch kaama korun zorui, dha tiatrantle don tiatr “hit” korun dakhoile zalear, kaama vanttun diun, dha tiatrantle panch tori “hit” korun dakhounk zaunchem naslem ?

Hanv, hem mhojem mot boroitana , khuincheai “Director”-acho guneanv korina.
Guneanv korunkui zaina.
Heraim nattkam vo “Drama”–chea itihasant, adim oxench ghoddlam.
Hem amkanch, novem nhuim.

Arthik Poristithi (Financial Constraints) hem amkam, oxem korunk laita.
Punn atam , mhaka zalear dista , vell aila amcheam thoddeam tori “Director”-ani, fuddlem paul marpacho.
Mhunnge, veg-veglleam kaamank, veg-veglleam zannkaranchi budh gheunk.
Apnnavelo zata titlo bhar unno korunk. Vegllo boroupi, vegllo digdorspi, vegllo nirmato, vegllo kantaram / kant rochpi, veglle bhumika korpi adi..adi..adi.
Zann ekleann, aplench kaam favo titlo bhor gheun kelem zalear, kitlo boro to tiatr zaunchonam ?
Sogleanch kaamak, zannvik munis rokddech mellonant zalear, thoddeam kaamank tori zannkar haddun hi osli suruvat korunea.
Tednanch ki amchea mogachea, apurbaiechea tiatrachi khori udhorgot zaunk pauteli. Konkani Tiatracho dorzo anikui unchvea paunddear pautolo.

SOGLEANK TENCH
Oslinch udhorgotichim paulam marun, heram bhasanchim nattkam zaum “Drama”, sudhronk pauleat.

Goychea bhair, zaum videxant, kitem ghoddtta tacher ami lokx diunchi goroz..
Tancheam nattkani zaum drama-nt eka eka kaamank ek ek zannvik munis asta.
Nirmato vegllo, boroupi vegllo, digdorspi vegllo, geetam rochpi vegllo, adi..adi..adi.


GOROZ
Zaite pauttim, prekxak (tiatr–polloinar) magta ek, punn tanchi goroz dusrich.
Amii tiatrist, prekxakank magta tench dita, goroz tem dinam.

Prekxakanchi gorozui puri korunk amchi zababdari.
Teach borobor, amchea Konkani Palkachii goroz puri korunk amchi zababdari.

Hem, aiz nam faleam zaunkuch zai.
Aizuch zalear, kitem vaitt ?
Ho kortolo, to kortolo, mhunn raunchem nhuim.
Konnem tori suruvat korunkuch zai.
Tor, hanvench suruvat kiteak korchem nhuim?
Oxem amcheam “Director”-ani, chintunk zai.


ZABABDARI
Konkani Tiatracho dorzo odik voir kaddunea.
Svarth kuxin dourunea.
Zannvik munxeanchi budh gheunea.
Ami konkani tiatracher zoddtta tituntlench, il’lem teach Konkani tiatrachea udorgothi khatir vaprunea.
Hi zaun assa, dor-eka konkani tiatrachea,“Director”-achi zababdari.

Remember always, “Two heads are better than One”
“Too many Cooks will not spoil the Soup”, if all the Cooks know their job well, and will work towards a common goal. i.e. betterment of the Konkani Tiatr.


30 Mai 2008
Wilmix Wilson Mazarello
wilson_mazarello@rediffmail.com

www.goa-world.com/goa/tiatr
Gulf-Goans e-Newsletter
http://www.yahoogroups.com/group/gulf-goans/
GULF-GOANS e-NEWSLETTER (Since 1994)
Moderated by Gaspar Almeida & Presented by Ulysses Menezes