'Sonstha Asun Faido Koslo?'

'Sonstha Asun Faido Koslo?'

- Wilmix Wilson Mazarello


Khobor:-
Tachi pirai :- 40 vorsam,
Tachem Nanv:- Piedade Camilo Carvalho,
Tacho Ganv:- Uguem (Sanguem),
Tachi Vyavasai (Proffession):- Songitkar (Musician-Bass Guitarist),
Songitantlean Seva :- KONKANI TIATR,

Okosmat, Abril-ache 25 ver, 2008, Piedade Camilo Carvalho, zankam sogott mogan “Piety”, mhunn ulo mari, aplea Hero Honda motorcycolir, ghara portota astana, ek minancho “truck” eun tankam dhoko marlo ani “Piety” thuinchea thuinch,somplo.

“Comedian Ambe”, hancho Tiatr “Kallem Mazor” chalu assa..
Hea tiatrant , “Piety”, Bass-Guitar vazoitalo.
Ek boro songitkar, ani lhan utrancho munis.
Tiatristank ani kheritponni tachea ghorcheank ,”Piety” sasnank unnom zalo.
Devan “Piety”-chea othmeank, sorginchem sukh favo korum.
Hem amchem, sogleam Tiatristanchem, magnnem.

Dolle Pauta punn Hath pavona:-
Magnneam xivai ami tiatristani, tankam anink kitem dium eta ?
Hea adiim oxech, anik zaite muzgankar, tiatrak veta astana vo tiatrak saun portota astana vatteruch sompleat.
Tiatristani, tancheai othmeank, sorginchem such favo zaunk,magnnem kelem.
Magnnem soddun, team songitkarank vo tanchea ghorcheank, amchean dusrem kainch korunk xoklem nam..
Muzgankarank mhunnat vo Tiatristank, amche koddchean, magnneam xivai dusrem kainch mellona.
Magnnem amkam sogleank gorjechem, hantunt dubau nam.
Punn, tea xivai amchean, amcheam muzgankarank anink kainch korunk zaina? Kiteak ?

Poristithi:-
Muzg vo Songitkar tiatrak samkech gorjeche.
Muzg nastana, tiatr sobona, vo tiatr, tiatr kosso dissona.
Orxinch titrak “trumpet”, “saxophone” adi., funkiche instrument vazoupi, unnem zaun tiatristank borech tras poddonk lagleat.
Teach borobor atam, “guitar”, “keyboard” adi. vazoupii, mellona zalear tiatrache kosle haal zaum eta tem chintat.
Tiatrache, samkech bhognnar zaunk pautele.
Muzg nastana tiatr, tiatr kosso dischoch nam.

Karannam:-
Tor tiatr vazounk, nove nove muzgankar, fuddem soronam zaunk, karann kitem kai?
Tiatrant “zodd” assa tedna zoddunk melltta, punn “job-security” nam.
Kedna, kaamuch nam zaun tum bekar urtolo , hem konnanchean sangunk zaina.
Tiatrant, “provident-fund”, gratuity”, insurance, adi. adi. toslem kaim nam.
Mhunnttoch, tiatrant vazounk konn fuddem sortolo?

Tiatristancheo kaim sounstho assat.
Punn teo sogleoch sounstho, nanvancheo.
Konnui ek tiatrist, melear, amcheam soustham kodde ek “Anuns” (Obituary-Ad), legit ghalunk tank nam.
Zalear, tanchea ghorcheank, interacho khorch diupachi axea tor, sodduch.


Mhojem Ontoskorn:-
Oslea vellar, hanv mhakach ek osokt munis kosso polletam.
Dusreank bott dakhounche poilim hanv mhakach poilo guneanvkari tharaitam.
Unnem cheallis vorsam , hanvem he “Konknni Machi”-echi seva kelea.
Itleam vorsam uprantui mhojean, amcheam tiatristank ekttaim haddunk xoklena. Mhojean ,tiatristancho, ek “khoro-ekvott”, ghoddun haddunk zalem nam.
Khub proitn kel’lo punn ies mell’lench nam.
Kiteak kai Deva?

Aiz, mhojinch chintnam mhaka sotaitat, mhunnon , “Konknni Machi”-en, mhaka zaitem dilam, torui, mhojean amche he tiatristanche somudaiek kainch korunk xoklena ,kiteak?

“EKVOTT”:-
Kortolo zalear zaitem zata, punn sogleancho adar zai. Sogleani ekvottan vauronk zai.
Ekleachean tem zaina. Ami svarth soddun somestanchem boreponn chintunk zai.
Porot porot ami teach vixoeacher eunk zai,”EKVOTT”.
Hea ekach, “EKVOTT” utrak lagun, aiz ami tiatrist fattim urleaum.
Hacher kitleanch zannani boroilam, kitleanch zannani suchoilam, kitleanch zannani gailam, torui to “EKVOTT” kossoch ghoddon ailo nam..

Axea soddun diunchi nhuim. Proitn bondh korchenhuim.
Ravon na pavon ek dis ho “EKVOTT” ghoddon etolo.
Amkam nhuim zalear, amche fuddle pillgek tori melltolo.


Muzgankaranche Proxnn:-
Muzgankaranche proxnn somzon ghetolo zalear zaite assat.
Pollounk gelear tiatrant, amkam tiatristank jitlo maan melltta, titlo maan amcheam muzgankarank mellona.
Zantteam muzgankarank tiatr korun aile mhunnttoch tankam ratche Moddgonvam haddun soddttat. Thuichean ghara vospachi bondobost nam.
Nam mhunn tankam, sokallim zaisor, vo ghara vospachi “bus’ mellosor khuim tori raupak/nidhpak, tancho vo tiatristancho zago nam.
Vatter kosloi obsoeg ghoddlo zalear tankam “Insurance" nam.
Kednaim jeunnanchea vellar tiatr kelo zalear, muzgankarankui jenvonn melltelem, hachi khatrich nam.
Zaite pauttim bhukea pottar te tiatr vazoita.
Faleam konnui Muzgankar melo zalear, lokank kolloupa-khatir ek “anuns” ghalteli, tanchi “Sounstha” nam.
Hea kallar, Goycho Serkar ani kaim serkari Sounstho. Vorsantlean ek pauttim tori, tiatristancho bhoumaan kortat.
Punn, bhoumaan zal’leam modem choddxem, muzgankar assoch nam. Kiteak?
Eke vatten ami muzgaknkar amkam gorjeche mhunn manun ghetaum. Dusre vatten tankam favo to maan diunk ami fattim.
Dor vorsak, ek vo don “Senior Tiatrist”-ank, ‘State Cultural Award” favo zatach. Tancheach borobor sodanch, eka tori tiatrantlea muzgankarak oslo “Award” diuncho mhunn, ami magnnem korunk zai.

Sogleanchech Proxnn:-
Heo osleo oniti amcheam muzgankaram sovench nhuim, tiatrist kolakaram soveim ghoddttat.
Goroz assa ami hacher niall korunk.
Muzgankar zaum tiatrist, Poddekar zaum “Lightman” vo “Sound-Operator”, tiatr machievelo lhanantlo lhan karbhari legit, amkam sogle gorjeche. Ami sogleanchem boreponn chintunk zai. Tednach ki ami tiatrist khuim tori mukar pautele.

Soglench, serkar kortolo mhunn raulear zaina. Ami poilo fuddakar gheunk zai.

Tiatr Polloinar, Gheiat fuddakar
Xevttak ek suchounnim amcheam tiatr-achea borea magpeank.
Tiatr jitlo amcho, titloch tumchoi. Ho tiatr khorench uchvea paunddear pautolo zalear , tiatristancho khoro “EKVOTT” gorjecho.
Tiatristani hea adim, “EKVOTT” ghoddun haddunk khub proitn keleat, punn tankam ies mellunk nam.
Atam zalear, mhaka khorench dista, vell aila “Tiatr Polloinarani”, he dixent fuddakar gheuncho.
Ek khoro, “Tiatristancho Ekvott” ghoddun haddunk.

Zuim amche Tiatrist “fail” zaleat, thuim goddiek, amche Tiatr Polloinar “pass” zait.


Wilmix Wilson Mazarello
http://www.goa-world.com/goa/tiatr/


Archives: http://brestarpodddeafattlean.blogspot.com/2008/03/pordddea-fattlean.html