SOT SODANCH KODDU LAGTA

SOT SODANCH KODDU LAGTA

- Wilmix Wilson Mazarello



RATCHEA DON VAZTAM

Amchea ghara-laginch ek ‘khuris’ assa. Khursa samkar ek vhoddlem zhadd. Zhadda-mullant don ximittiche banc, “tourism-department’-ache.

Heam dissani bhorpur gormi zata mhunnttokoch, amchea xezarche bhurge thuim , ratchea vareak , team banc-ancher, boson khobro martat.

Ami tiatrak saun kednaim ratcheam donank /oddechank, ghara portotam, tedna passun te bhurge, thuim khobro marit astat

Don dis fattim, ami oxinch Bardezant tiatr korun, ratchea donank ghara portolim.
Khub gormi zatali.
Khursa samkar alelea ekach banc-acher dog zann bhurge boson khobro martale

Dusro banc rikamo also, mhunnttoch amii chintlem thoddo vell, amii tea rikamea banc-ar vareak bossonea mhunn.

Te dogui , sumar vis-ekvis vorsam piraeche bhurge, aplech khobrent gul zal’le.
Ami thuim eun bosleant tem, tenni nond passun korunk nam, ani uloit raule.
Ratchim don voranchi xant rat mhunnttoch amkam tanchem ulovop, ekan-ek utor, spoxttponni aikonk etalem.
Team dogaim bhurgenchem ulovop itlem moujevont aslem ki tem aikon ,amchoi vell bore moujent passar zalo


AIKOL’LI KHOBOR

Aikol’li khobor iead korun, tech toren hanvui tumkaim sangpacho proitn kortam.
Team dogaim bhurgeanchim nanvam hanv nokllo.
Mhunnoea, eklo Ladru ani dusro Pedru.

Ladru: Tum kiteim sang, Pulis “top” assa.
Pedru: Pulis “top-u”? Kiteaku ? Pulis ponch.
Ladru: Pulis ponchu ? Tum sarko assa mure ? Tuk kit borem laglona, sang pollenea ?
Pedru: Tenge eku vost bori mhunn mak sang tum ? Temi voit ting nanv ghannailam.
Ladru: Tum konna fobor korta ?
Pedru: Voi re ,tum kort tich fobor kort hanv. Pulisechi. Goychea Pulisechi
Ladru: Saiba maka sonsum boll di. Hanv Pulise fobor kornam. Hanv “Pulis” tiatra fobor kortam.
Pedru: Tum “Pulis” tiatra fobor korta ? Exem mhunn sang mure ? Hanv somjilom , tum Goyche Pulise voddvik sangot mhunnu.
Ladru; Goyche Pulise voddvik hanv kitea samgtolom ? Te muge konn tori ? Voilean maka Pulise choileari raag eta.

Pedru: Mhunnge, tum sangonk sodita, hea “season”ank “Pulis” tiatr sogleaun “best”, voi mure ?
Ladru: Voi tori ? Kit tiatr re to ? “Direction” best. “Acting” best. “Story” best. “Comedy” best.
Pedru; Aiem choilona re, punn tuj baxen, zaitea lokan sangil maka.
Forem boro tiatr mhunn
Ladru: Choilona ? Faleam vosson choi. Don –Don dissani Moddgonv zata.
Zalo patti “housefull”. Choitri, hanv kit sangot tem kolltto tuka.
Pedru: Exem mhunn aikil aiem.
Kit sumar dacoit re to ?
Ladru: Sanglear somzopa nam tuka. Choileari “fun” assa.
Tori tintutu ek “point” sangot tuk hanv . Aik.
To mhure, sarkem sangota ki Pulis, zaito goddbodd kortai, Punn te goddbodd korpa zababdar “Ministor” ani M.L.A.
Ministor ani M.L.A, pulisege kama menter zatai. Tenk sarkem kaam korpa dinaim.
Eklo chora dhorum laita, zalear dusro, teach chora soddum laita..
Esso fobor dacoit to.
Pedru : Sarkem tem. Hea Ministoram ani Amdaramku lagon soglem zata tem.
Ladru: Punn intunt “finally” guneanv konna zata ? Amcho !
Pedru : Amcho ? Kit kornu ?
Ladru: Aik. Pulis “corrupt” bikosof Ministor “corrupt”. Voi mure ?
Pedru: Voi.
Ladru: Ministor “corrupt” bikosof Lok “corrupt”. Voi mure ?
Pedru: Kit kornu ?
Ladru : Ministoram nivddun haddttai te konnu ? Lok nhum ?
Pedru: Voi re. Punn tek lagon, Lok “corrupt” kess zata ?
Ladru: Kess zata ? Zatachi.
Eleisanvam dissani poixe ghein “vot” ditai te konnu ? Lok nhum?
Poixe ghein “vot” ghatai tenk kit mhunnttaii ? “Corrupt” nhum ?
Voros bhor tumi tea Amdara / Ministora, galli martai, punn eleisanvam-dissani, painxeam vo hozram “nott” choil mhunttri, minti bhotor “change” zatai. He munis “corrupt” nhum ?
Pedru: Sarkem tugelem. Amge loka “Cosiens” nam. Duddu dakoilear soglem visrole.
Amkam , “Sarpanch’ boro nhum, “Mayor” boro nhum, “Chief Ministor” boro nhum , “Serkar” boro nhum, mhunnpa kesso hok’k assa ? Tenk sogleam nivddun haddttai, te ami nhum ?
Ladru: Atam kess uloilo ?
Pedru: Texem mure, pollem gelear amge tiatristui dhodd nhum re. Panch vorsam, te team Ministoram tashtai, tenchi ghann kortai. Punn eleisanv eil mhunttri teanch Ministoram-kodde poixe ghetai, tenge “meeting”-am voitai, kantaram mhunnttai ani tenkanch “vot” ghal mhunn lokam sangtai.
Ladru: Sarkem tugelem. Esso tiatristanm ani patieupachem ? Heam tiatristam “consiens” assam ?
Teka lagon, lok magir team tiatristam tonddar marta “ Tiatrist dusreage ghor kexem saaf korpa zaiem tem sangpa bore assai, punn aplea ghor kitu mellem assa, tem mat choinaim”


KODDU SOTH

Hem aikotoch, amchean anink thuim ravonk zaiana zalem. Soth koddu laglem. Kitleim koddu tem zaum, torui soth tem soth. Kallzak toplem.

Ek zaap kaddinastana ami thuisorlim, luvan utton koddsorlim, ani ghara gelim.

22/5/2008

Wilmix Wilson Mazarello
wilson_mazarello@rediffmail.com
www.goa-world.com/goa/tiatr
Gulf-Goans e-Newsletter
http://www.yahoogroups.com/group/gulf-goans/
GULF-GOANS e-NEWSLETTER (Since 1994)
Moderated by Gaspar Almeida & Presented by Ulysses Menezes