Saturday, August 2, 2008

Kala Akademi Poramporik tiatr Kola Sompounk Sodta?

Kala Akademi Poramporik tiatr Kola Sompounk Sodta?

- Wilmix Wilson Mazarello


POILI KHOBOR:-
Ek kall oslo aslo, Tiatristank Goyant “Tiatr” korunk, borech tras poddttalet.
Goychi Suttka zaunche poilim, Goyant “Tiatr” kortolo zalear, Portugez serkarachi porvangi gheunchich poddttali.
Tiatrak “Censor”lagtalo, tikettincher “Tax”, Gaunchea “rejidor”-ak kollounni, adi.. adi. rattavolli korcheo poddttaleo.
Atam toslem kaim nam khorem, punn atam vegllech torecheo, noveo oddchonni, ubeo zal’leo disti poddtat.
Kednaim oxem dista, somazant kaim zann ,”Tiatr”-ache dusman assat, zancheani “Tiatr” disan-dis fulta ani “nett” dhorta, to pollounk zaina.
Tankam, kaim vankddeam serkari nokor-ancho, adar gheun, “Tiatr”-uch marun uddoil’lo zai.
1. Poilem mhullear, “Hall”-anchem bhaddem vaddoit ravop.
2. Dusrem mhullear, “Hall” khali assun legit,”Tiatr”ak dinastana dovrop.
3. Tiatr chalu astana,mud’dom Hall”-antli bizli, bondh uddovop.
4. “Hall”-ant “Air-Condition” bondh uddoun, polloinarank trasant ghalop.
5. “Hall”-ant “Air-Condition” cholonastana legit, Tiatr kelo zalear, kainch unnem korinastana, ak’khem bhaddem ghevop.
6. “Hall-Tikett-Counter”-acher, tiketti vikunk thoddech dis divop.
7. Konnancho “Tiatr” boro cholta mhunn kolltanch, mud’dom taka “Hall”, assun nam mhunnop.

Hem oslem, aiz kaal borench, chol’lelem dista.
Heam dissani tor, Goychea “Kala Akademi”-nt, jem kitem chol’lam, tem samkench, mud’dom, Tiatristank sotaupachem anik ‘Tiatr’-uch marun uddoupachem “paul” mhunnlear zata.

Tumi soth mandxeat, hanvem sanglear ki, aiz kaal, kaim amche tiatrist, ratchea don-ank, Ponje vochon, Kala- Akademi-chea bhair nidhun rautat, ani sokallim 6 vorancher “line’-in ube ravon “Hall-Booking” kortat mhunn ?

www.kalacademy.org
Sothmandunk augodd lagta nhuim ? Punn hem “Soth”.
Tumi somzoxeat hanv, konn noveam “Tiatr- Producer”-anchi khobor sangtam kai mhunn.

Nam! Vhoddle-vhoddle, nanv–voste “Producer/Director” legit, hem oslem unnemponn bhogtat.
Jeam kolakaranchi kola, hozarani lok Tiatrant pollounk eta, tech kolakar nidhonastana, Kala-Akademi-chea bhair, “foot-path”-ir, sokallim zaisor ravtat, fokot “Hall-Booking”korunk.
Ked’di loz hi amkam .
Hea , 21vea xekddeant,Tiatristrani osle tras kaddop ? Hall”ank lagun ?



Hachem, karann kitem zait ?
Konn tori Kala-Akademi-ntlo Odhikari, amkam tiatristank apleam bottancher nachoita, ani tachea kumpasar, ami tiatrist nachtat.
Tiatristank babddeank, gorjek poddon nachonchem poddtta zait
Khorench ! Ek pautt tiatr, bhair kaddlo mhunnttoch , Ponje-nt kaim tiatr korinastana ravom-ieta.?
Nam! Ponje tor, “Tiatr”-achem vhoddlem “Center”
Hachoch faido, Kala Akademi-che Odhikari ghetat.

Oslea vellar, kednaim amkam oxem dsta, “ AIZ, TIATRISTANCHO KHORO EKVOTT ASLOLO ZALEAR, KITLEM BOREPONN ZAUPACHEM ”. He tras amkam kaddunk poddche nasle.

DUSRI KHOBOR::-
Alinch, Mars-achea, xevottachea sumanant,,kitleaxeach “Tiatr-Producer / Director”-ank, Kala-Akademi-nt saun, “chitti” aileo.
Tea chittincher oxem boroil’lem, ki Abril-ache 1-ler saun, “Kala-Akademi (A/c Hall)”- achem bhaddem vaddoitat.
Dor-eka proeog-ak Rs 8000/- aslem tem, atam Rs 13700/- zata (soglem dhorun).
Toxench, tech “chitt”-ir boroilam ki, je konnem Abril-ache 1-ler, vo tea uprant “Hall- Booking” kel’lem assa, tannem pondra-dissam bhitor, thuim eun, voile Rs. 5700/- farik korche.
Konn farik korina, tankam dil’lem “Hall” legit, porot vhortole.

Kosli “dadagiri” ti polloeat, Kala Akademi-chi ?
Hi “chitt” vachun Tiatrist samkech bejar zale.
Nam vincharop, nam pacharop. Bhaddem vaddoilem.

Ek tor, kaim zannanchea Tiatrak orxinch, chodd lok zaina, tankam babddeank, hench Rs 8000/- bhaddem, chodd lagta.
Ani atam tachea voir, anink Rs 5700/- farik korunk zai.

Barik chintlear , hem Tiatracher ani tiatristancher, Kala Akademi-chem, ek virudh “paul”.
Mud’domuch kelam kai kitem? Hacher, il’lo niall korchi goroz assa.

Tiatrachi “tikett” fokot Rs 60/-.
Tikettinchi “dor” itli komi assun , choddan-chodd Tiatristank, Tiatrancher, luskonn zata.. Punn amche Tiatrist, Ponje-cheam “Tiatr”-plloinaranchem chintun, luskonnui zalear sonsun, Ponje-nt Tiatr korit astat.


GOIR SOMOZ :-
Kala Akademi-che Odhikari goddiek, “House-Full” zatat, tech proeog polloun, chinta astele, ki tiatrist Tiatrancher, borech duddu zoddttat mhunnon.

Tancho ixeop osso astolo :- A) “Hall”-ant bospacheo kodeli .....900
B) Tikettinchi “dor”....................Rs. 60/-

Mhunnttoch “Tiatr’-achea dor–eka proeogacher iennavoll....Rs. 54,000/-
Soglo khorch, Rs. 30,000 /- dhorlo zalear legit, “Tiatr-Producer / Director”-ak , dor-eka proeogacher Rs. 24,000/- faido urta.

“Kont” pollounk, sarkem-xem dista, punn “chintop” chukichem.
“House-Full” zalolea Tiatr-acher, dhorun-ea, khorench Rs 24,000 , faido urta.
Punn, kitlea “Producer / Director”-anche Tiatr, Kala-Akademi Hall-ant “House-Full” veta zait ?
Bhou Thoddeanche.
Ani, je konnanche poile 3 proeog, “House-Full” vetat, tanche, tea-uprant zatat team proeogancher, konn nodor marta zait ?
Urlolea proeogank “lok” unno zaun, ”Producer” babdde, jem kitem adim zoddlam tem legit, heam proegancher ghaltat,.anik xevttak luskonnuch bhogtat.
Tor faido anik, khuim urla tor ?

Kala-Akademi-cheam Odhikareank hem “kont”, kiteak somzona kai?
Vo te, “dolle assun, kudd’de” zatat ?
Konnui “Producer / Director” luskonn” bhogta tedna, Kala-Akademi kaim, eka tori proeogachem bhaddem soddit ? Nam !

Hi zali khobor, konnanche 3 tori proeog , “House-Full” vetat, team “Producer/ Director”-anchi.
Urlolea Producer-anchi poristithi koxi-kitem assa , ti pollounea.

Choddxea, “Produce/Director”-ancho, ek legit proeog, Kala-Akademi-nt , “House-Full” zaina.
Tanche, babddeanche , soglech proeog, luskonnant.
Zalear, heam “Tiatr Producer”-ancheo oddchonneom, konn somzon ghetolo ?
Tankam, babddeank, hech Rs 8000/- bhaddem bhorunk, borech tras poddttat, zalear te Rs 13,700/- khuinchean haddttele ?

Kala –Akademi-k , bhaddem vaddoupachim karannam, sangunk sompim,
Hem vaddlam , tem vaddlam, mhargai vaddlea, mhunllear zalem.
Punn, te mhargaie-pormonnem, Tiatrachi tikett kaim vaddlea ? Nam!

Zalear “Tiatrist”, he duddu khuinchean haddttole ? Tiatrachi tikett vaddoili zalear , amcho lok, te duddu khuinchean hadttolo ?
Ani somoz , ami Tikett vaddoili, ani lok apnnank tankona mhuunnon, zorui Tiatrak ienastana raulo , zalear ho “maar”, Tiatra-k boschona?


HETU KITEM? ( INTENSAUM ? )
Vo Kala-Akedemi, oxench kitem korunk sodhta kai ?
Tiatr-uch marun uddounk sodhta kai ?

Osliim, kaim chuintna motint etat , jedna Kala-Akademi, konnank vincharinastana, somtench Rs.5700/- , bhaddem vaddoupachem “paul” marta.
Kala- Akademi, hi ek Goy serkari sounstha. mhunnttoch “Hall’-ui, Goy Serkarachem.
Serkari sounstho rochleat, Goykaranchi kola , sonskruti, rakhunk, nhuim marun uddouk

Vete-paulak, Goycho Mukhel Montri , Shri Digamber Kamat, goykarank sangtoch assa, ki apunn, Goycheam kolakarank, ani kheritponni Tiatrist-ank, favo to adar ditolo mnhunnon.

Zalear, “Kala-Akademi-Hall”-achem. bhaddem vaddoun , ho kolakarank koslo adar kai ?
Vo,Kala-Akademi-che Odhikari, bhaddem vaddoitana, Mukhel Montreakui vincharina kai ?

EKVOTT GORJECHO:-
Goroz assa, amcheam tiatristani ekttaim eun , eka avazan, amchea serkarak sangunk, ki tennim hem “paul” fattim gheunchem.
“Kala-Akademi-Hall”-chem bhaddem, anink-thoddim vorsam tori, aslolea teach paunddear dovorchem.
Mhunnge, Rs 8000/- eka proeogak ( soglem dhorun).

Punn amche Tiatrist, ekttaim eun , ekvottan, serkarak ulo martele zalear, ek “Milagr” ghoddonk zai, oxem kaim lokanchem mot.
Hich, amcheam tiatristanchi, vhoddantli-vhodd osoktai.
Hakach lagun, aiz amcheam Tiatristanchim kolinch kaama, sompeponni zainant.
Deva ! Amche Tiatrist , “khorea ekvottacho valor”, kedna somzotele kai ?

Torui astana , ek bori gozal, atamchea kallar, “Romi Lipi Action Front “ sarkeo sounstho Goyant, assat mhunnon.
R.L.A.F, he sounsthen fuddakar gheun , tiatristanche votin , Goychea Mukhel Montri, Shri Digamber Kamat-hankam, tiatristancheo oddchonneom somzaun, ek “magnneam- potr” kelem.

Amcho Mukhel Montri, Shri Digamber Kamat, apunn uloita toxench, korun dakhoupi zalear, to jerul hi, tiatristanchi oddchonn somzotolo, ani hem, bhaddem vaddoupachem “paul”, jerul fattim gheunk laitolo, mhunn ami somzotam.

SOGLEANCHO HOK”K:-
Atam mogachea vachpeano ani Tiatr-achea mogiano, tumi chinta astelim, hem soglem hanv tumkam, kiteak sangta kai mhunnon, Nhuim ?

Karann assa.
Tiatr, tiatristanchoch nhuim. Tiatr sogleam Goykarancho.
Aiz xemboram-voir vorsam “Tiatr” jivo assa zalear, to tumkam lagon. Tiatr mogiank ani konknni mogiank, lagun.
Mhunntoch tiatra-babtint soglem zanno zaunk , ho tumcho “hok’k”..

Kala-Akademi-chea “Air-Condition-Hall”-ant bossun, tiatr pollounk, borem dista.
Punn tench, “Hall-Booking” korunk, “Tiatr-Producer”-ank kitem-kitem korchem poddtta, ani kitem-kitem bhogchem/sonschem poddttta, henvuim zanno-zaunk, tumcho “hok’k”.
Teach khatir, hanvuim somzotam hi mhoji zabadari, hem tumkam sangunk.

Sanglea xivai kollona. Koll’lea xivai somzona.
Kitem ghoddtta tem, “podd’dea samkaruch nhuim, podd’dea fattleanui”.

Tumcho, Wilmix
(c) Wilmix Wilson Mazarello
Wilson Mazarello [wilson_mazarello@rediffmail.com]
http://www.goa-world.com/goa/tiatr/


Archives: http://brestarpodddeafattlean.blogspot.com/2008/03/pordddea-fattlean.html

No comments: